ADD TO COLLECTION
  • Add to new collection
  • CANCEL

    Ehara te hekaheka i te tipu, ehara hoki i te kararehe. Nā tēnei āhua ōna, ka pai pea hei tāhuhu mō tētahi matapakinga i te akomanga e ana ki ngā āhuatanga me ngā whakarōpūtanga o ngā mea ora. 

    I tēnei mahi, ka whakamātau ngā ākonga i tō rātou mōhio ki ngā hekaheka. He patapatai tuihono, ā, ka taea anō te mahi ki te pepa. He pai te patapatainga nei hei mahi tuatahi e kitea ai e pēhea rawa ana te mōhio o ngā ākonga ki te hekaheka, hei aromatawai whakakapi rānei, hei mahi hāhau pārekareka rānei e tūtaki ai ngā ākonga ki ētahi o ngā āhuatanga, ngā wāhanga me ngā painga o te hekaheka.

    Kia oti tēnei mahi, te tikanga kua āhei te ākonga:

    • te whakautu pātai whāiti mō te hekaheka 
    • te tirotiro, te whakatika rānei i āna whakautu, mā te toro i ngā rauemi ipurangi e hāngai ana 
    • te tautohu i ētahi o ngā hekaheka o Aotearoa me ngā kāinga noho o tēnā, o tēnā.

    Tirohia anō hoki tēnei patapatainga e whai hononga ana: Ngā mātauranga me te whakamahi a te māori i nga hekaheka.

    Tīkina te kōnae Word (kei raro nei te hononga).

    He whakamihi

    I hua ake tēnei rauemi i tētahi aratohu pūtaiao mā ngā kaiako, ko Ngā Hekaheka o Aotearoa te ingoa. I tuhia te aratohu nei e Tākuta Peter Buchanan, o Manaaki Whenua; Tākuta Georgina Stewart, o Te Kura Mātauranga, Te Whare Wānanga o AUT; me Hēni Jacob. He mea tuhi ngā rauemi nei i runga i te aro nui ki te titiro a te Māori ki ēnei āhuatanga.

    Tēnei te mihi a te Pokapū Akoranga Pūtaiao ki a Manaaki Whenua me ngā kaituhi kua whakaae nei, kua āwhina nei anō hoki i te whakawhitinga o ngā kōrero nei hei rauemi ipurangi. E taea ana tētahi tauira whitihiko o te Aratohu mā te Pouako te tiki atu i Huia Publishers.

     

      Published 21 November 2018 Referencing Hub articles